OBST – Ôtwartŏ Bühna Ślōnskich Textōw – Annaberglandu

OBST – kŏżdy, co trochã znŏ niymiecki, wiy, iże OBST miyni „ôwoc”. OBST tukej zajś miyni Ôtwartŏ Bühna Ślōnskich Textōw. Bezto tysz OBST Annaberglandu niy yno nawiōnzuje do czejśni, ftore kwitnōm na szosyjach, co kludzõ nŏs bez wiosnã na Annaberg, ale je to wortspiel, co pokŏzuje, iże typowym ôwocym Annaberglandu je ślōnskŏ gŏdka. Kedyjś mianowali ślōnski Wasserpolnisch, co blank wpiyrwy niy bōło negatywne, yno miyniōło neutralnie dialectus aquatico-polonica, to je spracha gŏdanŏ bez lujdzi przi Ôdrze a na polach kole ônyj. Jako wiymy Ôdra płynie zarŏzki kole Annabergu a dojś poblisku ôd Lejźnicy – zarŏzki we Dzieszowicach. Bezto tysz żŏdnygo niy baje dziwować, kej przijedzie a zagŏdŏ do Ślōnzŏkōw sã i usłyszy ślōnskõ gŏdkã ôd tako mianowanych Kobylŏrzy.
Ôtwartŏ Bühna Ślōnskich Textōw Annaberglandu, to je cojś czygo jeszcze u nŏs niy bōło: Calujśki wieczōr yno po ślōnsku ze ślōnskimi autorskimi textōma a czowiykōma, co tworzōm dzisiej po ślōnsku kulturã! Je to piyrszy veranstaltung/wydarzynie zrichtowany blank po naszymu, kaj baje szło posuchać ślōnskõ gŏdkã ôd roztōmajtych lujdzi ze naszygo nŏbliższygo regiōnu ale i ze inkszych teili Oberschlesien. Przicziniajõ se ôni do podtrzimaniŏ ślōnskij gŏdki a pokŏzaniŏ, iże ślōnskŏ kultura je tym barzij möglich po ślōnsku!
OBST Annaberglandu je to forma Kulturowygo Laboratorium, coby wyciōngnyć a pokŏzać potyncjał sprachigowo-kulturowy ze Annaberglandu, kaj ślōnski je dalij żywy a skōnd pochodzõ nŏważniyjsi badacze ślōnskij sprachy a kultury choby Prof. Reinhold Olesch (Annaberg), Dr. Herbert Matuschek (Ôtmant), Prof. Tomasz Kamusella (Cisowa) a Prof. Joanna Rostropowicz (Dzieszowice). Ideeja Ôtwartyj Bühny Ślōnskich Textōw zainicjowoł Adam Peter Kubik, jako kōntynuacyjõ Warsztatōw Pisaniŏ Po Ślōnsku 2025, co piyrszy rŏz zrichtowane ôstały latojś we sōmsiydnich wsiach Rojziyntōw (gmina Wielge Strzelce) a Dolna (gmina Lejźnica), a prziciōng lujdzi ze roztōmajtych teili Annaberglandu: ôd Cyntawy, Ujejźdźca bez Porambã, Wysokã, Annaberg, Dolnã a Rojziyntōw a po Kodnicã, jako i dalszich teili Oberschlesien choby Najdek przi Tarnowskich Gōrach, a nawet tysz i Ślōnzŏkōw ze Niymiec.
Piōntek wieczōr 21. novembra 2025 ô 18.00 poczynōmy bezto ze Ôtwartõ Bühnõ Ślōnskich Textōw we Gelarije Sztuki we Lejźnicy (Nad Wodõ 15, 47-150 Lejźnica). Ôrganizatorōma OBST Annaberglandu sõ Lejźnicki Ôstrzodek Kultury i Rekreacyje (PL: Leśnicki Ośrodek Kultury i Rekreacji) a redakcyjŏ i autory „We Ślōnsku. Kulturmagazin po naszymu”. Plan wiyczoru:
1.
Prezyntacyjŏ nagrań ze textōma ôd autorkōw a autorōw ôd Ślōnzŏkōw ze Niymiec a Texasu
2.
Wrãczynie urkundōw do teilnehmerōw/uczestnikōw Warsztatōw Pisaniŏ Po Ślōnsku 2025
3.
Prezyntacyjŏ ślōnskich textōw bez autorki a autorōw na żywo
Zaprŏszōmy chãntnych (egal skōnd!), co poradzõ po ślōnsku a chcõ pokŏzać swoje texty i ôdczytać abo ôdśpiywać ône po ślōnsku, do zgłoszyniŏ se do 19. Novembra 2025. (Kejbyjś se za festy trŏpiōł abo stressowoł wystōmpiyniym abo Ciybie genau niy baje, mogesz tysz przisłać nõ aufnahma/nagraniy video abo audio). Bez 5 Minut bühna baje nŏleżeć do Ciybie!
Zamelduj se a wyjślij zgłoszynie do 19. Novembra 2025 (strzoda) na mail: weslonsku@gmail.com abo zgłosić se bez telefōn we LOKIR (77 461 53 91) ze tymi informacyjōma:
1.
Fto żejś je? To je – krōtkŏ notka ô sobie
2.
Co chcesz pokŏzać? To miyni – tymatyka textu a forma (czytanŏ/śpiywanŏ)
3.
Numer telefōnu (a e-mail) do kōntaktu
4.
(Mogesz nõ przisłać text, coby bōł na prezyntacyji widoczny)
*Pamiyntej, coby twōj text abo nagraniy niy bōły zusammen do kupy dugsze niże 5 minut.
Bez wieczōr nŏs pokludzõ czowiyki ze Annaberglandu: Izabela Namyślik (autorka „Słodko gorzkij poezyje” ze Poramby) a Adam Peter Kubik (chefredachtōr „We Ślōnsku. Kulturmagazin po naszymu” a rechtōr ślōnskij gŏdki na VHS Heidelberg ze Rojziyntowa). Dodatkowo baje to möglichkeit, coby poznać siybie a poôsprŏwiać se po ślōnsku ze autor(k)ōma i kupić ksiōnżki napisane po ślōnsku. Eintritt je frei/wstymp je wolni, bezto zaprŏszōmy wszyjskich zainteresowanich do przijechaniŏ do Lejźnicy 21. Novembra 2025 ô 18.00 na OBST Annaberglandu, kaj gojście we publicznojści sōm mile widziani!
Chŏwcie se a do blank hned!

Ôrganizatory OBST Annaberglandu

Ôtwartŏ Bühna Ślōnskich Textōw (OBST) Annaberglandu
Kedy: 21. november 2025 (piōntek), ô 18.00
Kaj: Galerijŏ Sztuki LOKIR, Nad Wodą 15, 47-150 Lejźnica
Chcesz pokŏzać swōj text ôpisany abo śpiywany na ślōnskim treffie? Przijedź do Lejźnicy przi Annabergu a bez 5 Minut bühna baje nŏleżeć do Ciybie!
Wyjślij zgłoszynie do 19. Novembra 2025 (strzoda) na mail: weslonsku@gmail.com abo zgłosić se bez telefōn we LOKIR (77 461 53 91) ze tymi informacyjōma:
*Teilnahma/uczestnictwo we wydarzyniu miyni, iże wyrażŏcie zgoda na publikacyjŏ Waszyj ôsoby a wizerunku we mediach, kej treff baje fotografowani, nagrywani a/abo transmitowani.